რადისონ ქოლექშენი წინანდლის მამული

რადისონ ქოლექშენ წინანდალი მდებარეობს ჭავჭავაძეების მამულის ისტორიულ პარკში, ალექსანდრე ჭავჭავაძის XVIII საუკუნის სახლ-მუზეუმის მახლობლად. მუზეუმი ქართული რომანტიზმის ფუძემდებლის და მისი ოჯახის ცხოვრებას წარმოაჩენს და იმ ეპოქის საქართველოს კულტურული და პოლიტიკური ცხოვრების შესანიშნავი მატიანეა. სწორედ ამიტომ, ალექსანდრე ჭავჭავაძის სახლ-მუზეუმი და მთლიანად წინანდლის მამული ქვეყნის ერთ-ერთ მნიშვნელოვან კულტურულ ღირსშესანიშნაობად მიიჩნევა.  

წინანდლის რადისონ ქოლექშენ სასტუმროს დიზაინზე საერთაშორისოდ აღიარებულმა არქიტექტორებმა — ჯონ ფოტიადისმა, ქრისტინა გაბასმა და დამიენ ფიგუერესმა იმუშავეს. მისი საოცარი ინტერიერის შექმნაში დიდი წვლილი შეიტანეს მსოფლიოში ცნობილმა ინდუსტრიულმა დიზიანერმა ინგო მაურერმა და ქართველმა მოქანდაკემ თამარ კვესიტაძემ. სასტუმროს მიმდებარედ ძველი ღვინის ქარხნის ტერიტორიაზე მოწყობილია ორი საკონცერტო დარბაზი - ამფითეატრი, რომელიც 1200 მაყურებელს იტევს და 500 მაყურებელზე გათვლილი დახურული საკონცერტო დარბაზი. ისინი გამოიყენება სხვადასხვა დანიშნულებით და კონცერტების გარდა მასპინძლობს ქორწილებს, გალა ვახშმებს, სპექტაკლებსა თუ მოდის შოუებს.